Foreldrahandbók

Um leið og við viljum bjóða barnið ykkar og ykkur velkomin í leikskólann okkar, Smábæ, viljum við gefa ykkur upplýsingar um ýmis atriði sem tengd eru starfsemi leikskólans og nayðsynlegt er fyrir foreldra að vita.

Leikskólinn Smábær var opnaður 15. september 1985 við Norðurveg í Hrísey. Hann hefur verið rekinn eftir þörfum bæjarfélagsins, bæði frá kl. 7:30-12:15 og frá 7:30-17:15. Þann 15. október árið 2000 var Smábær fluttur í húsnæði grunnskólans við Hólabraut. Markmiðið með flutningi leikskólans var að samnýta skólahúsnæðið, tækjakost og fagkunnáttu leik- og grunnskólakennara. Einnig var hugmyndin að brúa bilið milli leikskóla og grunnskóla og skapa þannig samfellu milli skólastiganna. Okkar markmið er að gera börnunum það auðvelt að flytjast milli skólastiga með faglegu og góðu samstarfi. Leikskólinn var rekinn af Hríseyjarhrepp fram til ágúst 2004 en þá sameinaðist hreppurinn Akureyrarbæ. Í dag er leikskólinn rekinn af Akureyrarbæ og er opinn frá 7:45-15:15 og boðið upp á 4-7 klst. vistun.

Leikskólinn Smábær og Grunnskólinn í Hrísey hafa í sameiningu ákveðið að hafa þrjú meginmarkmið að leiðarljósi í skólastarfinu. Markmiðin eru manngildi, þekking og metnaður. Þessi markmið voru sett í samráði við nemendur. Þá hefur einnig verið útbúið merki sameiginlega fyrir grunn- og leikskóla.

Meta og bera virðingu fyrir okkur sjálfum og öðrum. Láta hæfileika hvers einstaklings njóta sín

Efla þekkingu með fjölbreyttum verkefnum. Leggja okkur fram um að vera sjálfstæð í þekkingarleit

Efla okkur sjálf og umhverfi okkar og vera góðar fyrirmyndir. Setja okkur háleit markmið og leggja okkur fram við að ná þeim.

Hugmyndafræði Smábæjar byggist meðal annars á lífsviðhorfi, gildismati, þekkingu og reynslu starfsmanna hans, ásamt kenningum sem settar hafa verið fram af fræðimönnum og rannsóknum sem gerðar hafa verið á leikskólastarfi. Leikskólastarfið byggist ekki á einni hugmyndafræði heldur er horft til nokkurra kennismiða við uppbyggingu leikskólastarfsins.

Hugmyndafræðilegur grunnur og vinnulag byggir á framfarastefnunni sem kennd er við John Dewey. Virkni barnsins sjálfs og vinnuferlið er það sem skipti mestu máli en ekki útkoma einstakra verkefna. Unnið er með opin efni sem gefa barninu möguleika á að velja leið og útkomu. Lögð er áhersla á sjálfstæði barnsins í athöfnum daglegs lífs og að byggja upp sjálfsmynd þess. Leikurinn er aðalkennslutæki leikskólans og barninu eiginlegt á leikskólaaldri. Lögð er áhersla á leikinn sem aðaluppsprettu reynslu, þroska og samskiptahæfni barnsins.

Fjölgreindarkenning Gardners byggir á því að allir einstaklingar búi yfir að minnsta kosti átta greindum á jafnmörgum sviðum sem taka þurfi tillit til og þroska með hverjum einstaklingi:

Við leggjum áherslu á fjölbreytileika í leikskólastarfinu þannig að börnin fái tækifæri til náms og þroska og geti náð viðunandi árangri á öllum sviðum.

Í Smábæ eru gerðar reglulegar skráningar á leik og starfi barnanna. Markmiðið með skráningu er að gera leikskólastarfið sýnilegt fyrir foreldrum barnanna, yfirstjórn leikskóla Akureyrar og öðrum sem koma að leikskólastarfinu.

Við lítum til hugmynda Golemans um tilfinningagreind og byggjum lífsleiknistarf okkar á hugmyndum hans. Goleman vill meina að góð tilfinningagreind sé grunnurinn að velgengni í lífinu. Tilfinningagreind byggir að mati Golemans á því að hafa sjálfsvitund, sjálfstjórn, félagslega hæfni, einbeitingu og sjálfsaga. Við leggjum áherslu á rækt við tilfinningagreind hvers og eins svo allir fái notið sína á eigin forsendum. Eitt af þeim kennslutækjum sem við nýtum er kennsluefnið Stig af Stigi sem gefið var út af Reyni ráðgjafarstofu á Akureyri.

Skóladeild Akureyrarbæjar fer með yfirstjórn leikskólanna, fjármál, áætlanagerð, innritun barna, stefnumótun og skipulagsmál. Leikskólafulltrúi er næsti yfirmaður leikskólastjóra Akureyrarbæjar. Leikskólaráðgjafi er leikskólastjórum og starfsfólki leikskólanna faglegur ráðgjafi um málefni einstakra barna. Foreldrar leikskólabarna geta leitað til leikskólaráðgjafa með mál tengd börnum sínum og leikskóladvöl þeirra. Ráðgjöf vegna einstakra barna fer fram hjá Skóladeild og/eða Fjölskyldudeild Akureyrarbæjar. Leikskólaráðgjafi vegna sérkennslubarna annast faglega ráðgjöf til leikskólastjóra og annarra starfsmanna leikskóla, vegna barna sem þurfa á sérkennslu að halda. Fjölskyldudeild Akureyrarbæjar sér um að veita börnum sálfræði- og talmeinaþjónustu. Háskólinn á Akureyri veitir stofnanaráðgjöf til leikskólanna að beiðni leikskólastjóra og/eða skóladeildar.

Leikskólinn er opinn frá 7:45-15:15. Foreldrar eru beðnir um að virða þann vistunartíma sem þeir sömdu um í upphafi. Vegna dagsskipulags og til að auka öryggiskennd barnanna er mikilvægt að barnið mæti reglulega í leikskólann. Það hefur sýnt sig að börn sem mæta reglulega í leikskólann eru ánægðari og þeim líður betur á leikskólanum.

Kynning á leikskólanum

Þegar barn fær inngöngu í leikskólann er haft samband við foreldra og þeir boðnir velkomnir í leikskólann ásamt barni sínu. Foreldrar koma með barnið í heimsókn til að skoða leikskólann og í kjölfarið á því fara foreldrar í viðtal með aðlögunaraðila. Foreldrum er kynnt starf leikskólans og leitast er jafnframt eftir upplýsingum frá foreldrum um barnið.

Gagnkvæmur trúnaður er forsenda þess að barninu líði vel í leikskólanum

Aðlögun

Góð samvinna milli foreldra og starfsfólks er nauðsynlegur þáttur í aðlögun barna til að hún takist sem best. Barnið þarf góðan tíma til að kynnast leikskólanum, starfsfólki og börnum og er góð aðlögun þýðingarmikil fyrir áframhaldandi dvöl barnsins. Nauðsynlegt er að barnið komi reglulega í leikskólann á meðan það er að aðlagast leikskólanum. Þó svo miðað sé við fimm daga í aðlögun eru börnin misjöfn og þurfa mismunandi langan aðlögunartíma. Metið er hverju sinni hvort ástæða er til lengri aðlögunartíma en fimm daga. Aðlögun miðast við 5 virka daga þar sem börnin dvelja stuttan tíma til að byrja með. Foreldrar eru með börnunum fyrstu stundirnar og fara síðan að draga sig í hlé þegar barnið hefur öðlast meira öryggi.

1. dagur: Barnið kemur í heimsókn með foreldrum í u.þ.b. klukkustund, skoðar leikskólann og kynnist starfsfólki.

3. dagur: Barnið dvelur í þrjár til fjórar klukkustundir og tekur þátt í fastri starfsemi.

Stefna Smábæjar er að skapa umhverfi þar sem börnin fá tækifæri til frjáls leiks. Skipulagðar eru stundir þar sem áhersla er lög á hópastarf, hreyfistundir, markvissa málörvun, listasmiðju, tónlist og söng auk samvinnuverkefna við Grunnskólann í Hrísey. Hér má sjá drög að dagsskipulagi en starfsfólkið leggur áherslu á að trufla ekki leik barnanna og líta því á dagsskipulagið sem stuðning í starfi í stað þess að líta á það sem óbreytanlegt plagg.

7:45-8:15 Leikskólinn opnar/frjáls leikur

8:15-8:45 Morgunverður

8:45-9:00 Söng-/Sögustund

9:00-10:30 Hópastarf/hreyfistundir/listasmiðja/val o.s.frv.

10:30-10:45 Ávaxtatími

10:45-12:00 Útivera

12:00 Hádegisverður

12:30 Hvíld/róleg stund

13:15 Föndur/val/verkefni/bókasafn o.s.frv.

14:20 Síðdegishressing

14:40-15:15 Frjáls leikur/Útivera

15:15 Heimferð

Í Smábæ leggjum við áherslu á að leikskólinn er fyrsta skólastigið í menntun barnanna. Leikurinn er leið barnsins til menntunar og þroska og því er hann hornsteinn leikskólastarfsins. Námssvið leikskóla eru áhersluþættir í leikskólauppeldi. Þau eru:

Námssviðin skarast og þau eru samofin undirstöðuþáttum leikskólastarfsins: leik, daglegri umönnun og almennri lífsleikni. Markmið okkar er að skapa aðstæður og umhverfi þar sem einstaklingurinn getur þroskað með sér þá hæfileika sem hann býr yfir. Þetta gefur honum sjálfstraust og tækifæri til að verða virkur þátttakandi í samfélagi okkar á hverjum tíma.

Samverustundir

Samverustundir eru góður tími til að syngja, segja sögur, gera málörvunaræfingar og ræða saman. Börnin hafa ákveðið sæti í samverustundum sem veitir þeim öryggi og festu. Lagðir eru inn nýir söngvar með vissu millibili. Við leggjum áherslu á lestur bóka og sagna og á fjölbreytt efni svo allir fái eitthvað við sitt hæfi.

Matartímar

Máltíðir á Smábæ eru útbúnar af matráði leik- og grunnskólans og af starfsfólki. Leitast er við að hafa hollan og næringarríkan mat á borðum. Boðið er upp á morgunverð, ávaxtatíma, hádegisverð og nónhressingu. Á hverjum morgni er fyrirfram tilnefndur þjónn. Hans hlutverk er að finna til morgunverð/nónhressingu á borð með aðstoð starfsfólks. Hann býður svo börnunum að ganga til borðs. Við matarborðið er lögð áhersla á góða borðsiði auk þess að hjálpa börnunum að læra að skammta sér sjálf, smyrja brauðið sitt, hella í glös o.s.frv. Matartímar eru upplagðir til samræðna og leggjum við áherslu á að njóta þessa tíma í ró og léttu spjalli.

Hvíld

Að loknum hádegisverði er róleg stund í leikskólanum. Yngstu börnin fara að sofa í vögnum sínum eða kerrum en eldri börnin leggjast á dýnu, fá kodda og teppi, og er hlustað á sögur eða lesin bók fyrir börnin. Stundin er ekki lengri en svo að börnin finni að þau hafa öðlast orku til að takast á við áframhaldandi leik og starf .

Hreinlæti

Við leggjum mikla áherslu á hreinlæti við salernisnotkun og bleiuskipti. Börnin þvo sér um hendur eftir salernisferðir og fyrir og eftir máltíðir með aðstoð frá starfsfólki. Meðan barnið notar bleiu sjá foreldrar um að barnið hafi nægar til skiptanna í leikskólanum. Ekki er æskilegt að börnin séu með buxnableiur í leikskólanum. Þegar venja á barn á salernið er mikilvægt að góð samvinna sé milli starfsfólks og foreldra. Foreldrar skulu taka fyrsta skrefið og þegar barnið hefur verið bleiulaust heima einhvern tíma er kominn tími til að prófa í leikskólanum. Með tímanum styrkist barnið og að lokum getur það verið bleiulaust allan daginn. Meðan þetta tímabil varir þarf barnið að hafa með sér næg föt til skiptanna og munið að samfellur eru ekki hentug nærföt við salernisþjálfun.

Fataherbergi

Útivistin á upphaf sitt í fataklefanum og reynum við eftir fremsta megni að gera þá stund eins skemmtilega og auðið er. Til að börnin njóti útiverunnar þarf klæðnaður að vera við hæfi. Með aðstoð barnanna ákveðum við hvernig skal klæðast og hengjum við myndir upp á vegg af þeim fatnaði sem hæfir hverju sinni. Mikilvægt er hverju barni að læra að klæða sig sjálft og er starfsfólkið til aðstoðar eftir þörfum.

Útiveran

Útivera er nauðsynlegur þáttur í leikskólastarfinu og metum við hverju sinni hversu lengi útivistin varir. Yfirleitt er miðað við eina klukkustund í senn en fer þó eftir aldri barnanna og veðráttu. Í útivist fá börnin tækifæri til að ærslast, hrópa og kalla auk þess að komast í snertingu við nánasta umhverfi og náttúruna. Lóð leikskólans er afgirt svæði inn á lóð grunnskólans og höfum við rólur, sandkassa, kofa og vegasalt til afnota. Við reynum að nýta okkur umhverfið utan leikskólans eins mikið og mögulegt er. Berjatínsla er liður í starfinu auk þess sem við erum með matjurtagarð og kartöflugarð þar sem við setjum niður á vorin og tökum upp úr á haustin. Matjurtagarðurinn okkar er liður í grænfánaverkefninu og verkefni Hríseyjar um sjálfbært samfélag. Kartöflur, kál, rófur og gulrætur eru þær matjurtir sem við leggjum áherslu á og er uppskeran nýtt í mötuneyti skólans.

Hópastarf

Börnunum er skipt í hópa eftir aldri þar sem farið er djúpt í ákveðin þemu eða verkefnavinnu. Lengd hópastarfstímanna fer eftir aldri barnanna en leitast er við að fá börnin til að sýna áhuga á verkefnavinnunni svo þau fái notið sín og læri að kafa djúpt í efnið sem unnið er með. Verkefnavinnan tengist oft samfélaginu þar sem nánasta umhverfi er skoðað og kannað. Að þekkja nánasta umhverfi sitt, sögu þess og menningu er mikilvægur þáttur í að lifa í sátt við samfélag sitt.

Valkerfið okkar er mjög opið og eru ekki takmörk fyrir því hversu mörg börn fá að fara á hvert valsvæði. Við reynum að hafa sem fjölbreyttust valsvæði svo börnin geti öll fundið eitthvað við sitt hæfi. Við notum valspjald í valinu en á því eru myndir af svæðunum sem í boði eru. Barnið fær mynd af sér og velur með því að setja myndina sína við mynd af því svæði sem það hyggst fara á. Barninu er ekki skylt að vera mjög lengi á hverjum stað þó svo ekki sé leyfilegt að þvælast á milli og trufla leik hinna barnanna.

Verkefni elstu barna

Elstu börn leikskólans fara í heimsókn í grunnskólann einu sinni í viku sem er liður í því að brúa bilið milli leik- og grunnskóla. Með reglulegum heimsóknum í grunnskólann læra börnin að þekkja umhverfið, kennarana og börnin sem veitir þeim öryggi áður en þau stíga sín fyrstu skref á næsta skólastigi. Unnið er að verkefnum sem tengjast samfélaginu og fá börnin tækifæri til að kanna út frá sínum eigin hugmyndum og þannig öðlast nýja þekkingu út frá nýrri reynslu. Verkefnið er tengt inn á öll námssvið leikskóla.

Foreldrar bera frumábyrgð á uppeldi og velferð barna sinna en leikskólanum ber að veita foreldrum stuðning í uppeldinu. Við leggjum áherslu á góð samskipti við foreldra sem einkennast á trausti milli heimilis og skóla.

Foreldrasamtöl

Foreldrasamtöl eru einu sinni á ári til að ræða um líðan og þroska barna sinna. Þó svo einungis sé skipulagt eitt foreldraviðtal á ári geta foreldrar pantað viðtal við leikskólastjóra/deildarstjóra ef þeim liggur eitthvað á hjarta.

Mikilvægt er að foreldrar séu þátttakendur í uppbyggingu leikskólastarfsins. Foreldrar eru hvattir til að koma á vorhátíð leikskólans, myndlistasýningu barnanna, foreldrakaffi og aðrar uppákomur sem leikskólinn tekur þátt í. Á fundum geta foreldrar komið hugmyndum sínum og skoðunum á framfæri og reynir starfsfólk að koma til móts við óskir þeirra eftir fremsta megni.

Foreldrafélag Grunnskólans í Hrísey og leikskólans Smábæjar

Á aðalfundi foreldrafélagsins í maí sl. voru félög grunn- og leikskóla sameinuð í eitt foreldrafélag. Allir foreldrar/forráðamann verða sjálfkrafa félagar um leið og barnið byrjar í leikskólanum. Markmið foreldrafélagsins er að halda tengslum milli heimilis og skóla og tryggja velferð barnanna. Það fé sem foreldrafélagið safnar er ætlað í ferðir eða skemmtanir fyrir börnin. Ýmsir liðir hafa unnið sér fastan sess í foreldrasamstarfi. Foreldrar fara með börnum og starfsfólki í sveitaferð á hverju vori og sjá um grillveislu í sveitinni. Vorhátíðin er fastur liður og þá sér foreldrafélagið um grillveislu en hátíðin er haldin um leið og skólaslit grunnskólans fara fram. Foreldrafélagið fjármagnar leiksýningu með kökusölu og er reynt að fá tvær leiksýningar á ári í skólann. Jólaball, jólaföndur og fleira er einnig orðið að föstum liðum í samstarfi foreldra og skólanna.

Inngangur leikskólans er staðsettur á lóð grunnskólans. Bifreiðar og hjól eru með öllu óheimil á grunnskólalóðinni. Hjólum skal leggja við norðurhlið skólans og bílum skal lagt í bílastæði við Hlein, munið að drepa á bílunum. Að sjálfsögðu eru reykingar bannaðar bæði í leikskólanum, grunnskólanum og á lóð skólanna.

Að heilsa og kveðja er fyrsta skref barnsins í að læra hvernig aðskilnaður og endurfundir við fólk í lífi þeirra fer fram. Að læra að heilsa og kveðja fólk sem okkur er annt um er ekki markmið sem þarf að ná á fyrstu viku eða mánuði eða jafnvel ári á leikskóla. Þrátt fyrir margra ára reynslu okkar sem eldri eru, finnst okkur oft erfitt að skilja við fólk og hitta það aftur. Því er ekkert athugavert þó svo börn eigi misauðvelt með að heilsa og kveðja dag frá degi.

Móttaka og brottför

Leikföng að heiman

Skipulagðir dótadagar eru yfir vetrartímann en hafðir eru úti-dótadagar á sumrin. Tengihlutir eins og bangsar, dúkkur eða önnur leikföng skapa öryggistilfinningu hjá sumum börnum. Einn lítill bangsi, eða bíll, getur gert gæfumuninn í að kveðja og setjum við okkur ekki upp á móti slíku en allt er best í hófi. Börnin fá að hafa tengihlutinn hjá sér þar til farið er í morgunmat og þá er samið um að geyma hann í hólfi barnsins.

Leikskólinn er vinnustaður barnanna og því nauðsynlegt að þau komi í fötum sem sjá má á. Börnin þurfa að vera í léttum klæðnaði innan dyra sem þau geta sjálf klætt sig úr og í. Aukaföt þurfa alltaf að vera meðferðis sem hægt er að grípa í ef óhapp á sér stað. Börnin þurfa að vera búin eftir veðri hverju sinni en mikilvægt er að hann sé þægilegur og hindri ekki hreyfingar barnanna. Þar sem íslensk veðrátta er mjög breytileg er ekkert til fyrirstöðu að foreldrar geymi regnfatnað og kuldagalla í hólfum barnanna en æskilegt er að hólfin séu tæmd á föstudögum. Vinsamlegast merkið fatnað barnanna og munið að reimar í fatnaði geta verið varasamar. Gott er fyrir börnin að hafa meðferðis inniskó sem auðvelt er fyrir þau að klæða sig úr og í. Ekki er æskilegt að börnin séu í klossum innan dyra. Það er ekki gott fyrir litlar tær að stigið sé á þær í klossum.

Við leggjum okkur fram við að gera afmælisdaga barnanna eftirminnilega. Við útbúum kórónu handa afmælisbarninu og í sameiningu gera börn og starfsfólk afmæliskort. Bökuð er afmæliskaka í leikskólanum sem afmælisbarnið fær að skreyta áður en hún er borin fram. Farið er í hópleiki og fær þá afmælisbarnið svolítið að stjórna hvaða leikir verða fyrir valinu.

Leitast er við að fara eftir almanakinu hvað varðar hátíðir og hefðir í íslensku samfélagi. Samt sem áður skýrum við út fyrir börnunum að ekki séu allir sem halda slíkar hefðir vegna fjölmenningar í leikskólanum.

Foreldrakaffi er haldið tvisvar á ári í samstarfi við grunnskólann. Listsýning er einu sinni á ári og vorgrillið okkar er haldið sama dag og skólaslit grunnskólans fara fram en þá eru elstu börn leikskólans útskrifuð og skólastjóri grunnskólans býður þau velkomin á næsta skólastig. Haldið er jólaball í samstarfi við grunnskólann á sal skólans og eru allir velkomnir, ættingjar og vinir

Ef barnið kemur ekki í leikskólann vegna veikinda eða annarra ástæðna er mikilvægt að starfsfólkið sé látið vita. Hafa ber í huga að börn smita mest þegar þau eru að veikjast. Við biðjum foreldra að gæta vel að því að börn þeirra hafi náð fullri heilsu til að takast á við allt daglegt starf leikskólans jafnt innan- sem utandyra áður en komið er aftur í leikskólann. Veikist barn skal það dveljast heima þar til það hefur verið hitalaust í 1-2 sólarhringa og endurheimt þrótt sinn. Í undantekningatilvikum s.s. vegna langvarandi veikinda getur barnið fengið að vera inni 1-2 daga. Sjálfsagt er að barnið fari síðast út og komi fyrst inn, þannig að útiveran sé styttri fyrstu dagana eftir veikindi.

Varðandi veikindi og lyfjagjafir.

Mikilvægt er að foreldrar láti starfsfólk vita ef annar en þeir sæki barnið á leikskólann. Ef barnið vill ekki koma í leikskólann, látið okkur þá vita svo hægt sé að finna orsökina og vinna með barnið.

Ef óhapp eða slys verður á leikskólanum er strax haft sambandi við foreldra. Ef þurfa þykir er farið með barnið á heilsugæslustöðina í Hrísey eða á Dalvík eftir aðstæðum hverju sinni. Sveitarfélagið greiðir fyrir fyrstu heimsókn á Heilsugæslustöð vegna slysa sem verða meðan á dvöl barnsins stendur á leikskólanum. Þurfi barn áframhaldandi sjúkrameðferð er það á höndum foreldra.

Oft kemur upp sú aðstaða að börn þurfi að taka inn lyf af læknisráði. Æskilegt er að foreldrar hagi lyfjagjöf þannig að barnið þurfi ekki að taka það inn í leikskólanum.

Það er vert að minna á að fylgja þarf börnum í leikskólann. Ekki er æskilegt að börn yngri en 12 ára fylgi börnum á leikskólann nema sérstaklega sé samið við starfsfólk. Þessi regla var tekin upp við flutning leikskólans í grunnskólann. Fylgið börnunum - látið okkur vita af þeim og sjáið til þess að hliðið sé lokað.

Starfsfólk Smábæjar á rétt á þremur skipulagsdögum á ári. Þessir dagar eru nýttir til undirbúnings og mats á starfi auk endurmenntunar. Leikskólinn er lokaður á undirbúningsdögum og eru þeir auglýstir með mánaðar fyrirvara.

Þróunarverkefni Smábæjar og Grunnskóla Hríseyjar

Smábær og Grunnskólinn í Hrísey fengu Grænfánann í fyrsta sinn í maí 2005. Sameiginleg stefna skólanna er að halda áfram að vinna að umhverfismálum:

Þó svo skólarnir hafi fengið Grænfánann þá verða skólarnir teknir út af starfmönnum Landverndar á tveggja ára fresti. Markmið eru sett fyrir hvert tímabil og farið er í gegnum skrefin sjö. Þau markmið sem hafa náðst eru:

Uppsagnarfrestur eða breytingar á leikskólaplássi er einn mánuður og skal uppsögninni komið til leikskólastjóra á þar til gerðum eyðublöðum.

Ágætu foreldrar/forráðamenn. Að loknum lestri þessa handbókar vakna eflaust margar spurningar um starfsemi leikskólans. Þar sem svona handbók gefur ekki tæmandi upplýsingar um starfsemi leikskólans hvetjum við foreldra til að afla sér frekari upplýsinga hjá starfsfólki. Frekari upplýsingar er einnig að finna í skólanámskrá leikskólans sem hægt er að nálgast hjá starfsfólki.